لە جیهانی هاوچەرخ دا کە " دەستەڵاتی سەرەڕۆ" بە هەموو تواناوە تێدەکۆشی کۆمەڵانی خەڵک لێکداببرێ، هێزی گۆڕانخواز دەبێ بە هەموو تواناوە بەرەو ڕێکخستنی هەموو چین و توێژەکانی کۆمەلگا تیبکۆشی.
ڕێکخستنی هێزی لەبڕاننەهاتووی گەل، لە قەوارەی حیزب و دەستە و گرووپی سیاسی، سەندیکایی و ڕێکخراوە نادەوڵەتیەکان و بە تایبەت لەم ساڵانی دوواییدا لە قەوارەیەکی بچووکتر، وەک "ژووری بیرکردنەوە، یەک لەو دەستکەوتانەیە کە هێزی گۆڕانخواز بە شێوەیەکی بەرین کەڵکی لێوەردەگرێ.
ئێمە ژمارەیەک لە کوردانی ڕۆژهەڵاتی پەڕیوەی هەندەران وەک دەستەی دامەزرێنەر، پێمان وایە و ئاواتە خوازین کە بتوانین بەردی بناغەی بنکەیەکی لێکۆڵینەوە و توێژینەوەی کوردستان و بە تایبەت بۆ ڕۆژهەڵاتی کوردستان، ئەو بەشەی کە بە درێژایی دەیان ساڵ لە هەموو پرسە گشتیەکانی هەموو پارچەکانی تردا خۆی نواندووە و بە دەم هەموو ئێش و ئازارەکانیانەوە بووە دابمەزرێنین.
دیارە وەک هەموو کارێکی هاوبەش دەشێ لانی کەم لە شێوەی هەرە گشتیدا خاڵە فیکرییە هاوبەشەکان و بنەما هاوتەباکانی خۆمان دیاری بکەین .
１- کورد بە پێی هەموو پێوەر و فاکتۆڕەکانی زانستی و لە وانە: زمان، کولتوور، مێژوو و خاک، یەک "نەتەوەیە" کە بە پێچەوانەی ویست و خواستی خۆی، لە نێوان چوار وڵاتی دیکتاتۆر، سەرەڕۆ و خوێنڕێژدا دابەشکراوە و لە دامەزراندنی کیانی نەتەوەیی بێبەش کراوە.
２- داگیرکەرانی کوردستان وێڕای نەیاری و دوژمنکاری هەمە لایەنە و هاوبەشیان بەرانبەر بەکورد و کێشەکەی، بە هۆی جیاوازی "چۆنێتی" هەڵسوکەوتیان و هەر وەها بوونیان لە هاوکێشە سیاسی- سەبازییەکانی ناوچە و جێهان دا، بۆونەتە هۆی سەرەکی جیاوازی لە ناوەرۆک و ڕادەی خواست و دەستکەوتەکانی هەر پارچەیەکی کوردستان و دابەشبوونی هێزی سیاسی کورد.
３- لە ژێر کارتێکەری ژئۆپولیتیکی ناوچەکەدا و پێویستیی هەبوونی پشتی جەبهەیەک( بە تایبەت لە خەباتی چەکداری دا)، هەر هێزێکی سیاسی کورد کەم یان فرە، پێوەندی بە وڵاتێکی دراوسێوە هەبووە و هەیە کە خۆی کێشەی کوردی هەیە . ئەم ڕاستییە تاڵە ئەگەرچی توانیوێتی سەرەڕای ویستی سەرەکی دوژمنان، مەشخەلی خەبات راگرێ، بەڵام لە هەمان کاتدا "پاژنەی ئاشیلی" جووڵانەوەی کورد بووە و هەیە و کوردستان زۆر جاران لەم ئاستەوە گەزتراوە و خەساری گەورەی دیوە. هێلی سووری ئەم چەشنە پێوەندییانە برییتیە لە خەسارنەگەیاندن بە خەباتی بەشەکانیتر و داننان بە سەربەخۆیی سیاسەت و تاکتییکی هێزەکانیتر لە هەر پارچەیەک دا.
４- کیشەی نەتەوەیی لە کاکڵ و جەوهەری خۆیدا کێشەی دەستەڵات، غارەت و تاڵانی سەروەت و سامانی نەتەوەیی و بێبەش بوون لە دەستکەوت و داهاتەکانێتی. لەم ڕووەوە خەبات بۆ گەڕاندنەوە و پاراستنی سامانە نەتەوەییەکان، ئەرکێکی گرینگ و سەرچاوەی ستڕاتژیکی چێکردنی کیانی نەتەوەییە.
５- تەنیا ڕێگای چارەسەری کێشەی نەتەوەیی مافی چارەی خۆ نووسیینە! واتە بریاردەری نیهایی گەلە، کە دەبێ بتوانێ لە ڕێفراندۆمێکی ئازاد و دوور لە کارتێکەری چەواشەکارانە لە سەر داهاتووی خۆی بڕیار بدات. بێگۆمان هەموو تاک و دەستە و حیزبێکی سیاسی دەبێ و بۆیان هەیە ڕێگا چارەی پەسند کراوی خۆیان بە گوێی گەلدا بدەن و بانگەوازی سیاسەتی خۆیان بکەن . دیارە وێڕای ئەم ستڕاتژییە دوورخایەنە، داکۆکی و پەرەپێدانی هەر چەشنە دەسکەوتێکی کەم و کاتیش، نا بێ بە هیچ وەرنەگیرێ و پشت گوێ بخرێ.
６- جوانترین و ڕازاوەترین بەرنامەی سیاسی و کۆمەڵایەتی، تەنیا ڕیزکردنی کۆمەڵێک ووشەی جوان و لە سەر لێنووسە ئەگەر مەیدان و شوێنی بەرپا کردنی لە ژێر دەستەڵاتی خۆیی و نەتەوەکەیدا نەبێ . واتە پێوەندی "دەفر" و " تێکراوە" (ظرف و مظروف )، گەلێک گرینگ و رێنوێنە . کێشەی جیهانی سەردەم کێشەی خاوەندارێتی و دەستەڵاتە بە سەر کانگاکانی هەر دەم لە بڕان هاتووی ژێرزەوییدا. کوردستان وێڕای دارابوونی گەلێک مادە و ماتڕیاڵی هەمە ڕەنگ، خاوەنی نەوت و ئاوە و لە داهاتووی ناوچە و جیهان دا دەبێتە خاوەنی هەڵوێست و بڕیار. لە جیهانی سەردەمدا شەڕ و کێشەی دوو ناسیونالیزم بە ڕاشکاوی دیارە: ناسیونالیزمی هێرشکار و بەر چاو تەنگ و ناسیونالیزمی داکۆکیکار و رزگاریخواز. ئێمە خۆمان لە بەرەی ناسیونالیزمی داکۆکیکار و ڕزگاریخوازدا بۆ داکۆکی لە بەرژەوەندییەکانی نیشتمانی کوردستان، دەبینینەوە.
７- خەباتی بێ پسانەوەی گەلی کورد توانیوێتی سەرەڕای ژینۆساید و ئێتنۆساید، واتە فەوتاندنی جەستە و هزر، بەو ڕادە لە ڕاوەستاوەیی و قەوارە بگات کە سڕینەوەی "نەتەوەیی" چیتر بۆ دوژمن نەرەخسێ. تەنانەت لە وانەیە لێرە و لەوێ هەندێك لە مافە کولتوورییەکانیش دەستەبەر بکرێن. کێشەی کورد دەمێکە لە فازی "پاراستنی نەتەوەییەوە" گوازراوەتەوە بۆ فازی "پاراستنی خاک". دوژمن بە بەرتەسککردنەوەی خاک و گۆڕینی دێمۆگرافی، بە نیازە تا ئەو جێگای کە بۆی دەکرێ کوردستان "بچووک" بکاتەوە و خەلک و دانیشتوانی بگۆڕێ. بەم پێیە پاراستنی خاکی کوردستان بۆتە ئەرکێکی سەرەکی نیشتمانی. هەر بۆیەش دەبێ ئێمە لە دەستەواژەی تەنیا "کورد"ەوە بڕوێن بەرەو بەکار هێنانی دەستەواژەی "کوردستان" و "کوردستانی" بە هەموو پێکهاتەکانی ئێتنیکی و ئاینیەوە. هەر کەس لە کوردستان دەژی هاوبەش و هاوبەسەرهاتی کوردستانە.
ئێمە لەسەر ئەو بڕوایەن بە دانانی تریبۆنێکی ئازاد بتوانێن لەسەر ناسنامەی نەتەوەیی و نیشتمانی کورد، دۆزینەوەی ستراتێژی نەتەوەیی و شێوەی خەبات بۆ دەست نیشانکردنی دۆست و دوژمنی کورد بە وتووێژی ڕەخنەگرانەی بونیاتنەر یارمەتی دۆزی هەنوکەیی بزوتنەوەی رزگاریخوانەی کوردستان بدەین

له ئه‌گه‌ری هه‌ر گٶڕانکاریه‌ک له ئێراندا، ئه‌رکی ئێمه‌ی کورد چییه؟

به‌خۆشیه‌وە "ڕۆژنه‌" وەکوو مه‌کۆی باس و لێکۆڵینه‌وەی پرسه‌ گرینگه‌کانی کورد به گشتی و ڕۆژهه‌ڵاتی کوردستان به‌ تایبه‌تی، دەستی به کار کرد. ڕۆژنه تێدەکۆشی له هه‌ر ژمارەیدا گرینگترین چه‌مکی ڕۆژ بداته به‌ر باسی هه‌مه‌لایه‌نه. هه‌ر که‌س و لایه‌نێک دەربڕی به‌شێک له ڕاسته‌قینه‌یه و هه‌مووی ڕاسته‌قینه ته‌نیا له کۆی تێڕوانینه جیاواز و ڕوانین له هه‌موو گۆشه‌ نیگاکاندایه. به هیوای به‌شداری هه‌موو بیرمه‌ند و لێکۆڵه‌ر و چالاکانی سیاسی- مه‌دەنی.
یه‌که‌م مژارمان به هۆی گرینگ بوونی : "هه‌ڵوێست و هه‌ڵسوکه‌تی کوردی ڕۆژهه‌ڵاته له ئه‌گه‌ری هه‌ر گٶڕانکاریه‌ک له ئێران" دایه. نیزامی کۆماری ئیسلامی له ناوخۆدا تووشی قه‌یرانه، گه‌مارۆ ئابووریه‌کان کارتێکه‌ری قووڵ دادەنێن، ژیانی خه‌ڵک تووشی گرفت بووە و ناڕەزایه‌تییه‌کان په‌رەی سه‌ندووە و ئوپۆزیسیۆن چالاکترە. له هه‌ر ئه‌گه‌رێکدا هێزی سیاسی، مه‌دەنی و هاووڵاتیانی کورد دەبێ چ بکه‌ن؟ هه‌ڵوێستی گشتی چی بێ؟ و چۆن که‌م زیانتر به ئامانجه نه‌ته‌وەیه‌کانمان بگه‌ین؟.
به‌شداریتان جێی ڕێز و بێگومان ئه‌رکێکی نه‌ته‌وەییه.

بردنەسەری نرخی بەنزین لە ئژێران بوو بە هۆی کوڵانەوەی ناسوری چڵک کردووی دەسەلاتداریی دز و چەتە و جەردان لە کۆمەڵگای ئێراندا. خۆپێشاندان لە تاران، تەورێز، شیراز و ئەهواز و بهبهان دەستی پێکرد و رۆژهەڵاتی کوردستانیشی گرتەوە. کرماشان سەرپێڵی زەهاو و مەریوان وئیلام و سنە و سەقزی هەژاند.
بەپێی هەواڵەکانی ڕاگەیەنەرە گشتییەکان و مێدیای دیجیتاڵی، شەپۆڵی دەربڕینی نارەزایەتی زۆربەی شارەکانی ئێرانی داگرت. کۆمەڵانی هەراوی خەڵک ڕژانە سەر شەقامەکان و لەدژی دەسەڵاتدارە گەندەڵ و پیاوکوژەکانی کۆماری ئیسلامی دروشمیان داوە. هێزە چەکدارەکانی رژێم تەقەیان لە خۆپێشاندەرەکان کردوە و دەکوترێ کە ١٥ کەسیان کوشتوە و ژمارەیەکی زۆریشیان بریندار کردوە. چەکدارەکانی رژیم لە مەریوان و جوانرۆ بە بێ پارێزکردن تەقەیان لە خۆپێشاندەران کردوە و جارێکی تر رژیم سەلماندی کە دوژمنی سەرسەختی کورد و کوردستانە. بەپێی هەواڵی راگەیەنەرە گشتیەکان لە مەریوان کەسێک و لەجوانڕۆ سێ کەس کوژراون. بەڵام بێگومان ژمارەی کوژراو و بریندارەکان زۆر لەوە زیاترە.

دادگای لاهە ٣٩ کەس لەدەسەڵاتدارەکانی ئێران ، یەک لەوان خامنەیی بە کوشتاری مرۆڤ تاوانبار کرد.
دادوەرێکی دادگای لاهە لە نامەیەکدا بۆ بالوێزی ئێران، علیرەزا کازمی، ٣٩ کەس لە بەرپرسانی کۆماری ئیسلامی لەوانە عەلی خامنەیی، حەسەن ڕوحانی، ئیبراهیم ڕەئیسی، ڕەحمانی فەزڵی، مەحمود عەلەوی و عەلی شەمخانی لە پەیوەندی لەگەڵ کوشتاری خۆپیشاندەرانی خەزەڵوەری ۹۸ به تاوانى دژە مرۆڤایەتی، تۆمەتبار و بانگهێشتی دادگا کرد.